KUCHING, 20 April: Raban Ngerap Seksyen Tasat Jenayah Narkotik Indu Opis Polis Pelilih Padawan udah nangkap empat iku lelaki ketegal penyalah dadah di Satok Kuching.
Ku Tuai Polis Pelilih Kuching, ACP Ahsmon Bajah madah, tiga iku lelaki bansa Cina enggau siku lelaki bansa Melayu nya ditangkap lebuh Operasyen Khas Polis.
Ba dalam operasyen nya, polis meresa sebuah kerita bansa Proton Wira di Satok, Kuching.
![](https://s3.tvstv.my/wp-content/uploads/2022/04/278937167_296190122694758_5072940794379211892_n-2.jpg)
“Asil peresa nya, raban polis udah ngerampas dadah dipechaya bansa syabu enggau pemerat 103 gram ti beungkus RM10,000 enggau dadah dipechaya Pil Eramin 5 penyampau 64 leka enggau ti beungkus RM3,200,” ku iya madah.
Pia mega ku ahsmon madah, keempat-empat saspek positif dadah bansa Amphetamine /Methamphetamine.
Keempat-empat iku saspek ditan ba baruh Seksyen 39B ADB 1952 enggau Seksyen 15(1)(A) ADB 1952.
Ketiga-tiga saspek bansa Cina bisi ngembuan rikod penyalah bekaul enggau dadah.
![](https://s3.tvstv.my/wp-content/uploads/2022/04/278939158_296190162694754_8059794413977393095_n-3.jpg)
Iya munyi nya ba dalam siti penerang ke dipansutka IPD Kuching sehari tu berindik ari siti video ke ngekai ba laman rama bekaul enggau kes tu.
Berindik ari nya, iya ngelalau mensia mayuh anang nyadung tauka ngerembaika berita sebubu ngapa bekaul enggau video nya.