KUCHING, 20 April: Sarawak berengkah meri dos penyungkak COVID-19 ti kedua ba pun hari lima tu kena 22 April 2022.
Sapit Premier Sarawak, Datuk Amar Douglas Uggah Embas madahka, bisi dua kategori penerima ke patut nerima dos nya.
“Raban ti keterubah iya nya orang ti beumur 60 taun ke atas bisi risiko komorbid.
“Raban ti kedua iya nya orang ke bisi ngayanka kelai ke enda entu balat beumur 12 taun ke atas.
Uggah madahka, pengawa meri vaksin nya dipejalaika di semua Palan Meri Vaksin (PPV) di klinik perintah, klinik enggau sepital bayar.
Nangkan ke nya, Uggah ke mega Chairman Komiti Mutarka Penusah Ngenyit (JPBN) Sarawak minta orang ke patut nerima dos enggau deka nerima dos nya betelefon ngagai PPV ke semak dikena netapka hari bulan ngambi vaksin.
“Mensia mayuh ulih ngiga lumur telefon PPV ke bisi disediaka nengah laman Facebook rasmi Opis Pengerai Sarawak.
“Naka 19 April 2022, kira-kira 1,879,748 iku tauka 91% peranak besai tuai ke beumur 18 taun di nengeri tu udah nerima dos kedua.
“Nembiak ke beumur 12 nyentuk 17 taun, kira-kira 275,699 iku tauka 92.6% udah nerima dos kedua,” ku Uggah madah nengah siti penerang media lebuh Hari Tiga.
Iya madahka, penyampau kira-kira 84,677 iku tauka 38% nembiak mit ti beumur lima nyentuk ke 11 taun udah nerima dos satu.
Ku iya madah agi, naka 19 April, bisi 1,637, 167 iku tauka 90% pemayuh orang ke udah nerima dos penyungkak sida.
“Taja pan pia, aku ngansak penyampau 181,589 iku agi orang ke patut nerima dos vaksin datai ngambi vaksin sida enggau lengkas,” ku iya madah agi nengah penerang nya. – TVS
