KUCHING, 20 April: Polis Pelilih Kuching benung ngiga 34 iku orang ke bisi kaul enggau kes jenayah komersil iya nya nipu mensia mayuh nengah tali arus tauka E-dagang.
Ku Tuai Polis Pelilih Kuching, ACP Ahsmon Bajah Madah, kesemua saspek tu iya nya orang ke digiga sereta udah bejalaika jenayah nya kenyau ari taun 2006 nyentuk ke 2019.
Nangkan ke nya, Ahsmon madahka ari penyampau nya, bisi 29 iku lelaki enggau 5 iku indu ke berumur entara 26 nyentuk ke 52 taun benung digiga.
“34 iku tu bekaul enggau mayuh macham kes iya nya enam ari sida ke digiga tu enda lurus ati bejalaika pengawa lalu ditasat ba baruh Seksyen 408 Kanun Keseksaan lalu ke bukai bekaul enggau mayuh macham kes nipu nyengkaum Love Scam, Macau Scam, pengawa bebelika barang nengah tali arus, enggau pengawa minjau duit ti ngaul 28 iku saspek.
“Sida tu deka ditasat ba baruh Seksyen 420 Kanun Keseksaan ke ulih diukum jil enda lebih ari 10 taun,” ku iya madah ba siti aum media ti diatur lebuh Hari Satu.
Ku Ashmon madah agi, semua pengerugi ketegal 34 kes jenayah tu manggai RM2.3 juta.
Entara chara ke bukai saspek tu nipu mensia mayuh iya nya minta pemeri nguna nama gerempung, meranakka puku emas, enggau pengawa nyual meli tanah.
Penerang senentang 34 iku saspek ke digiga raban polis tu ulih dipeda ba laman web ba baruh tu.
https://www.facebook.com/photo/?fbid=295736432740127&set=pcb.295736919406745
