KUCHING, 19 April: Berindik ari pengerami Hari Raya Aidilfitri ti deka disambut ba bulan baru, Garis lalau (SOP) Hari Raya deka dibantaika Komiti Mutarka Penusah Ngenyit (JPBN) Sarawak enda lama agi.
Pekara nya dipadahka Penyanding Penemu JPBN Sarawak, Dato Sri Dr Sim Kui Hian.
Iya madahka, SOP ti deka dipadahka nya mesti bemalinka asil runding enggau pakar perubat.
“Pekara nya patut dibantaika enda lama agi, tang kami mesti bemalinka penemu ari pakar perubat.
“Pia mega, pekara senentang ngemeratka Garis Lalau (SOP) ke selamat maya Hari Raya, aku udah mantaika nya di Facebook Raban Respons COVID-19 HUS. Sida endang chukup manah.
“Lebuh kitai ngalih ngagai renggat endemik, kita mesti bisi nentuka pejalai angin ti manah ba rumah sereta nentuka semua orang ke berisiko tinggi nerima vaksin enti sida patut ngambi dos penyungkak,” ku iya madah rambau dirandau raban media ba dalam program buka puasa di Palan Konvensyen Borneo Kuching lebuh Hari Satu.
Berebak ari nya, Dr Sim ke mega Sapit Premier Sarawak ngelalau rayat di nengeri tu seruran nyaga pengerai diri taja pan menua udah ngalih ke renggat endemik.
‘Kitai enda nemu engka bisi varian baru ke jampat ngekai jemah ila. Kitai mesti bejejaga.
“Nyadi aku minta orang ti kala kena dirampit COVID-19 ngemeranka gaya pengidup ti manah laban enti kena kali kedua angka balat agi. Nya pekara ti dipadahka aku ngagai kita semua, deka balat agi laban imuniti kita agi ngelaban,” ku iya madah agi.
Iya madahka, entara tangkup pengawa ti dikemeratka perintah Sarawak iya nya nentuka pengerai rayat ba tikas ke manah.
