KUCHING, 19 April: Perintah Sarawak seruran meri perati senentang sebana, isu enggau penanggul ke ditapi rayat di nengeri tu ti nyengkaum isu rega tikit bilun.
Menteri Perengka Pengangkut, Dato Sri Lee Kim Shin madahka, perintah nengeri nengah Opis Menteri Perengka Pengangkut deka terus matau rega tikit bilun awakka enda kelalu mar sereta nambahka tating belanja rayat.
Iya madahka, opis menteri iya udah ngeluarka penenerang bekaul enggau rega tikit bilun ke dikurangka ari Semenanjung ke Sarawak enggau Sabah.
Pia mega, pemutus tu udah dipesetuju nengah kerejasama Suruhanjaya Penerbangan Malaysia (MAVCOM), Opis Bekuasa Penerebai Bilun Mensia Mayuh (CAAM) enggau Serikat Penerebai Bilun Domestik.
Lee nerangka, senentang opis menteri iya deka terus matau rega tikit bilun dalam timpuh bulan April nyentuk ke bulan Mei.
“Rega tikit bilun dipeda bisi nurun ba pun ari 16 April lalu diatu nengah siti penerang ungkup penerebai bilun entara 27 April nyentuk 8 Mei rega tikit RM105 nyentuk ke RM1,398.
“Ba timpuh 29 April nyentuk 1 Mei entara RM195 nyentuk RM1,398. Nitihka penerang nya mega rega tikit ke Sarawak enggau Sabah dalam timpuh nya ke dipatau entara RM300 ke RM500 sekali terebai,” ku iya madah.
Berindik ari nya, iya ngelalau mensia mayuh ti deka mulaika diri ke menua patut meli tikit tumu awakka bulih rega tikit ke murah.
“Nengah awak tu aku ngelalau sida ti deka pulai maya pengerami Hari Raya ngambika meli tikit tumu, anang nganti lama. Manah agi tumu ulih meli tikit murah, laban sistem tikit tu nitihka rega dinamik iya nya lumur pemadu murah nyentuk ke pemadu tinggi, nitihka peminta.
“ Nyadi tumu agi meli tikit bilun ba laman web enggau rega ti murah terus beli. Taja pia, opis aku deka terus matau kes tu, tikit ke dijual dikena berundingka enggau madahka rega tikit,” ku iya madah agi.
Iya mansutka jaku nya rambau dirandau pengarang berita pengudah ngulu program buka puasa di Palan Konvensyen Borneo Kuching lebuh Hari Satu.
