SARIKEI, 16 April: Program Jualan Keluarga Malaysia ti diatur Opis Menteri Pengawa Dagang Dalam Menua enggau Pekara Bebelika Barang (KPDNHEP) di serata menua nerima sambut ke manah ari mensia mayuh sereta diatu ba Sarawak program nya benung ranchak diatur ti nyengkaum di Bagi Menua Sarikei.
Nitihka penerang ti dipansutka UKAS, Kaban Parlimen Tanjong Manis, Ir Yusuf Abdul Wahab madah, program nya mantu ngurangka mimit tating belanja peranak seraya sida ulih ngatur belanja sepemanjai bulan Ramadhan enggau Hari Raya Aidilfitri ti deka disambut enda lama agi.
“Program baka nya deka diteruska sereta disukung awakka ulih mantu rayat bebelika barang ke diguna ninting hari ba rega ke murah mimit,” ku iya madah rambau bejadika program nya ti bepalan ba Kedai Sela-Mart, Taman Susur Jambu lebuh Hari Enam.
Beduduk ari nya, Yusuf arapka peranak ke mendam di Taman Susur Jambu enggau semak dia nguna manah peluang nya meli barang ke diguna ninting hari sereta ngatur belanja enggau chara ke manah.
“Aku beterima kasih ngagai Kedai Sela-Mart, Taman Susur Jambu ti udah nyadi kaban strategik laban udah bekerejasama enggau KPDNHEP ngemujurka program nya serak tu,” ku iya madah.
Program Jualan Keluarga Malaysia tu diatur kena 16 enggau 17 April 2022 berengkah ari pukul 9 pagi nyentuk ke pukul 4 lemai ti nyendiaka penyampau 21 bansa barang ba rega ke murah.
Kelimpah ari nya, iya madahka senentang iya udah milih lima bansa barang ti nyerangkung beras enggau telu Gred B dikurangka penyampau RM1 seraya gula, tepung enggau minyak makai plastik 1kg dikurangka penyampau 20 sen pun ari pukul 10 pagi nyentuk ke 12 tengahari sepemanjai program nya diatur.
Gambar: UKAS
