SARATOK, 10 April: Sepenyampau RM20,000 geran udah diungkupka ngagai Gerempung Bansa Dayak Sarawak (SDNU) dikena bejalaika aktiviti.
Kaban Kunsil Nengeri (ADUN) Krian, Friday Belik madahka, nengah mayuh macham aktiviti ke diatur, adat enggau main asal Iban enda lenyau ditelan arus pemansang kemaya hari.
“Budaya enggau main asal siti ari elemen bansa ti patut ditanka ngambika rebak biak dudi hari ila seruran ingat enggau nemu identiti diri,” ku iya dalam laman facebook rasmi iya lebuh Hari Enam.
Dulu ari tu, iya bisi ngulu Pengerami Tamat Ngajat Indu enggau Lelaki sereta Kuntau, Kelab Main Asal (MAS) SDNU Saratok lebuh Hari Enam.
Iya meri terima kasih ngagai SDNU ti udah mujur ngatur aktiviti bekaul enggau tradisi adat Iban iya nya ngajat enggau kuntau.
Sama bisi datai iya nya Sapit Menteri Bekal Kuasa enggau Pengeraja Asal Malaysia ke mega Kaban Parlimen, Saratok Datuk Ali Biju.
