SONG, 10 April: Siku nembiak bedarah ba pending pengudah kena tuchuk anak panah senapang ikan malam tadi.
Nitihka penerang ari balai Bomba enggau Penyelamat Song, sida nerima kangau ngenyit sentang penusah nya urung pukul 10:30 malam tadi.
Ku Komander Operasi, PBK II Nasihin Jaum madah, nembiak ke beumur 9 taun tu benama Larry Lang Monica kena tuchuk anak panah senapang ikan ba sepiak kanan pending tudah.
Ku iya madah, pengudah datai, raban bomba lalu mutung anak panah besi senapang ikan nya nguna ‘bolt cutter’.
Nembiak tu diripotka selamat enggau benung diperubat di Klinik Kesihatan Song.
