BINTULU, 24 Dis : Siku lelaki bebadi nyawa sepengudah entukar ‘Four Wheel Drive (WD)’ ti dibai iya ngelantak pun kayu ba endur lampu trafik JKR, Jalai Sultan Iskandar, Bintulu urung pukul 7.10 pagi tadi.
Ku Tuai Opis Pansik Enggau Penerit Adat Trafik Indu Opis Polis Kontinjen Sarawak, Supt. Alexson Naga Chabu madah, tudah ke benama Nanggai Simun ti beumur 60 taun berasal ari Rumah Assan Sungai Semebak.
Ku iya madah, tudah dipadahka bebadi nyawa ba endur penusah nya nyadi ari raban paramedik sepital besai Bintulu ketegal balat bakal ba pala enggau tubuh.
Asil tasat tumu tetemuka tudah benung bejalai ari mengeri besai nuju ke Jalai Bukit Orang.
Ku Alexson madah agi, entukar ke ditepan iya tepawah lalu ngelantak dua pun kayu ba tisi jalai alun sebedau tama ke dalam parit.
Tubuh tudah dianjung ngagai rumah mayat sepital Bintulu dikena mantu bejalaika pengawa tasat.
Alexson madahka, kes nya ditasat ba baruh seksyen 41 (1) Akta Perengka Pengangkut Jalai Alun 1987.
