MIRI, 24 Dis : Menteri mangku tanggungpengawa ba Komiti Mutarka Penusah Ngenyit Bagi Menua (JPBB) Miri, Datuk Lee Kim Shin madahka JPBB Miri udah sedia napi penusah ampuh bah di pelilih Miri berindik ari musim monsun Timur Laut ke dijangka nyadi sepemanjai bulan tu.
Iya madah munyi nya lebuh bejaku ba aum media kena hari Dua tu tadi.
Lee madahka ari JPBB Miri endang seruran besedia napi penusah bah dikena nyeliahka perkara ti udah nyadi baka di Semenanjung Malaysia.
“Semua ejensi ke bekaul dipinta seruran bejejaga belama lebih agi enti sema bisi sebarang penusah nyadi ketegal bah” ku iya madah agi.
Iya ke mega Kaban Kunsil Negeri (ADUN) Senadin nerangka, entara ejensi ke bekaul mutarka penusah bah iya nya Opis Pelilih Miri, Opis Parit Enggau Entali Ai (DID), Opis Kereja Raya, Kunsil Mengeri Besai Miri, Opis Bomba Enggau Penyah Penusah, Raban Soldadu Malaysia enggau ke bukai.
Ba penyendia komiti nya, JPBB Miri diatu benung bejalaika pengawa matau sekeda endur ti suah kena bah baka Long Lama enggau endur ke baruh di Baram lalu nentuka bekal barang pemakai endang chukup ngagai peranak ti mendam ba dia.
Kelimpah ari nya, sida mega matau endur ti suah bah di Miri iya nya kampung Batu Satu, Tudan, Desa Senadin, Senadin, Senadin Jaya enggau Lutong.
Lee madahka Petronas Carigali Sdn Bhd udah bekerejasama enggau ejensi bukai bejalaika pengawa meresi sekeda endur ba Sungai Lutong dikena ngurangka empas ari penusah bah tebal agi sepemanjai musin monsun tauka musim landas ke nuntung menua.
