SRI AMAN: Program Le Tour De Restoration (Greening Sarawak Campaign) Opis Kampung Sarawak renggat Sri Aman chakah dipejalaika dikena nerenak pemereti ati komuniti senentang guna nyaga pemanah kandang rampa menua.
Program tu udah dipenyadika Menteri Muda Pengelantang Komuniti, Datuk Francis Harden Hollis ba palan engkah kerita panorama benak Sri Aman, kena Hari Empat tu tadi.
Harden madah, program tu inisiatif perintah nengeri sarawak mulaika pemanah ekonomi pengudah covid-19 dalam pekara Environmental Sustainability.
Tuju program tu diatur dikena meransang komuniti ngemeranka rampa menua gadung enggau mengeri Simanggang dipilih nyadi palan Program Le Tour De Restoration Greening Sarawak Campaign.
“Kitai di Bagi Menua Sri Aman endang ngelaluka program bansa tu dikena meri penerang pasal tanggungpengawa Opis Kampung ba rayat lebih agi Tuai Komuniti ti dikangau datai enggau lebuh sida pulai ke menua sida empu sida patut bekunsi penerang nya ngagai nembiak pegai sida,”ku iya dalam siti penerang kena Hari Empat.
Ku Harden madah, Simanggang diatu ranchak dikemansangka nengah bemacham projek pemansang ke benung enggau udah dipejalaika baka New Simanggang Town Extension, Pasar Tamu Terminal Bas, Pasar Tamu Baru, Sri Aman Waterfront, Sepital Sri Aman Ii, Peace Park enggau kereja ngemanahka rumah Sri Aman ti nyadi Palan Galeri Pesaka Asal.
Semua projek pemansang tu deka ulih nyungkak sektor ekonomi di Simanggang taja dalam timpuh pemar betapi enggau pandemik Covid-19.
Ba kepenudi program, bisi diatur mega pengawa meri pun kayu belian ngagai sekeda tuai opis enggau tuai komuniti ti nyadika kelai deka nanam 35 juta pun kayu dalam timpuh lima taun tauka tujuh taun berengkah taun 2021 enggau tembu 2025.
