KUCHING:Menteri Muda Pengelantang Komuniti, Datuk Francis Harden Hollis bisi nyerahka chek bantu ari Unit For Other Religion (UNIFOR) ngagai sekeda gerempung pengarap di sitak Kunsil Nengeri (DUN) Simanggang.
Bantu tu dikearap ulih ngelempungka tating belanja rumah sembiang ketegal pandemik Covid-19.
“Tu bantu ari perintah nengeri Sarawak nengah UNIFOR khas dikena mantu pengarap bukai kelimpah pengarap Islam.
“Kitai meri besai terima kasih ngagai perintah Sarawak lebih agi Datuk Amar Douglas Uggah Embas ke mega Chairman UNIFOR laban udah ngemujurka peminta ari gerempung pengarap,”ku iya dalam siti penerang kena Hari Empat tu tadi.
Harden ke mega Kaban Kunsil Nengeri (ADUN) Simanggang ke lama madah, sepenyampau RM15,000 diungkupka ngagai tetiap gerempung pengarap.
Entara penerima bantu chek UNIFOR iya nya Simanggang Soon Heng Society, Gerempung Pengarap Ci Ji Sri Aman, Baang Lupar Buddhist Society enggau Sri Aman Buddhist Association.
Ba awak ke sama, Harden mega bisi nyuaka chek UNIFOR ngagai tiga rumah sembiang Cina Pasar Engkilili ngagai Engkilili Chinese Temple, Charitable Trust Board, Komiti Pengatur Kuil Haitoitel Chitian Taishin, Engkilili enggau The Marup Chinese Temple Charitable Trust Board sepenyampau RM15, 000 ungkup tetiap penerima.
Nya alai, iya ngarap bantu nya ulih diguna enggau memanah sereta nerenak pemanah ulah raban pengarap.
Ku iya, tu mih pemanah perintah Sarawak ti endang ngemeratka pengelantang rayat Sarawak ti ngembuan pupu bansa enda ngira penatai, bida pengarap enggau ke bukai.
