KUCHING: Mayuh macham projek pemansang infrastrakcha enggau utiliti ke udah enggau benung dikemansangka perintah nengeri ba serata nengeri Sarawak.
Tu nyerangkung ngangkatmanah tikas jalai tebing tasik enggau jalai besai kedua (Second Trunk Road), jematan, loji ai, sub stesyen karan, enggau menara telekomunikasyen ke udah didirika tauka benung diperambu sereta projek ke bukai.
Sapit Kepala Menteri, Datuk Amar Awang Tengah Ali Hasan madahka, taja pan sekeda projek pemansang tu udah dipejalaika perintah tang mesti deka dikemanahka tikas lebih agi ba kandang menua baru.
“Projek pemansang ti dipejalaika perintah ba mengeri besai dipeda lebih jampat sereta ranchak.
“Tu berindik ari peranak ke mendam dia makin sehari majak nambah sereta lebih jampat mansang ari menua pesisir,” ku iya madah nengah teks jaku iya ti dibacha Menteri Muda Pemansang Orang Dagang enggau Dagang Mit sereta Jelan Pemesai Datuk Naroden Majais beserimbai enggau Pengerami Nyerahka Pampas Tanah Ungkup Projek ‘Matang High Level Reservoir and Associated Pipelines’ maya Hari Empat.
Iya madahka, pengawa ngangkatmanah tikas perengkaguna ba kandang endur baru ba mengeri mesti deka dipejalaika.
“Nya kebuah tetiap iku Kaban Kunsil Nengeri sekalika ba mengeri tauka menua pesisir seruran minta ngagai perintah Sarawak bejalaika sekeda projek pemansang ba sitak ke dipegai sida.
“Kelimpah ari nya, perintah deka ngambi pulai baru tanah sekalika ngaul tanah ke bisi pengempu, tauka bepanggai ngagai tuntut tanah adat bumiputera (NCR) dikena bejalaika projek pemansang infrastracha enggau utiliti,” ku iya madah.
Tuju nya dikena nyendiaka perengkaguna mensia mayuh ke ngelantangka pengidup rayat ke mendam ba mengeri tauka menua pesisir.
Awang tengah ke mega Menteri Pengawa Dagang Entarabansa enggau Industri, Terminal Industri enggau Pemansang Orang Dagang nerangka, perintah Sarawak enda ngambi pulai tanah pechuma tang tanah ke diambi pulai nya bepelasarka undang-undang ba dalam Kanun Tanah Nengeri Bab 81 enggau Pekara 13 Konstitusyen Perintah Besai.
“Nadai siku orang ulih diambi reta enda bepelasarka undang-undang, nadai bisi undang-undang ti ngemendarka pengawa ngambi tauka nguna reta ngena chara dipejal sereta enda nyendiaka pampas ke patut diberi,” ku iya madah agi.
Kelimpah ari nya, iya madahka semua tanah ke diambi pulai deka dibayar pampas bepelasarka pekara ti diperatika Opis Tanah enggau Survey Sarawak sereta penyampau pampas ke dibayar nya diperundingka nengah chara ke patut ti nyengkaum utai tanam, strakcha ke bisi digaga enggau pemesai tanah nitihka rega kemaya hari diatu.
Pengawa nyerahka chek pampas tanah mandangka rayat nyukung sereta nyambut manah juluk perintah nengeri ti deka numbuhka kerejasama dikena nentuka pengelantang pengidup dudi hari.
Perintah Sarawak deka nyerahka chek pampas ngagai 24 iku penerima ti nguna ungkus penyampau RM24.6 juta maya Hari Empat.
