KUCHING, 5 SEPT: Bisi 18 operasyen meresa ngenyit pengawa bejudi nguna chara ‘Online’ tauka dalam tali arus di sebelah mengeri Kuching ti ngaul peyalah bejudi ba palan mensia mayuh sereta nyadi ejen judi (KIOSK) kenyau ari 1 Ogos nyentuk ke 31 Ogos 2021.9.5
Ku Tuai Polis Pelilih Kuching, ACP Ashmon Bajah madah, polis mega mujur meresa sebuah rumah banglo dua ringkat ba Jalai Lapangan Terbang Kuching ti nyadi Palan Judi Online (Calling Centre).
“Asil tasat polis tetemuka palan nya udah beoperasyen lebih kurang enam bulan.
“Bepelasarka rikod enggau transaksyen ke udah diperesa penyampau semua penguntung kasar sindiket nya manggai RM3,500.00 sehari sereta ulih manggai RM105,000 sebulan,” ku iya madah nengah siti penerang ti dikeluarka maya hari Enam.
Kelimpah ari nya, bisi 20 iku peranak menua tu iya nya 19 iku lelaki enggau siku indu, 13 iku peranak menua luar iya nya 11 iku lelaki enggau dua iku indu mujur ditangkap ba dalam semua operasyen nya.
“Entara barang ke dirampas baka enam unit monitor komputer, enam unit CPU, 10 telefon binching, router, modem enggau perengka bukai ti dikena sida bejalaika pengawa bejudi dalam tali arus nya,” ku Ashmon madah agi.
Berindik ari nya, keretas tasat udah dibuka ba baruh Seksyen 4(1)(g), Seksyen 7(2) enggau Seksyen 4(1)(C) Akta Rumah Judi Terbuka 1953.
OP Dadu Khas mega deka dikemesaika agi dikena mantu ngemuntanka pengawa bejudi ‘Online’ ti ngerugi ekonomi tebal agi ari sukut lisin enggau chukai.
