MIRI: Siku pemesai bomba bebadi nyawa sepengudah kerita ti dibai iya enggau dua iku orang tambang ngelantak sebuah lori ba tisi lampu trafik Kilometer 8, Pujut 7, Jalai Miri-Lutong maya pagi Hari Enam.
Tudah ke benama Mohd Azwanizam Abdullah, 42 taun, sereta gawa ba Balai Bomba enggau Penyah Penusah Batu Niah, diputuska parai ba endur penusah ulih raban perubat Sepital Miri urung pukul 5.45 pagi.
Tuai Opis Tasat enggau Penguasa Trafik Sarawak madah, Superintenden Alexson Naga Chabu, penusah ti nyadi urung pukul 4.30 pagi nya nyerangkung sebuah kerita ti ditepan tudah enggau dua iku penumpang sereta sebuah lori.
“Penusah nya nyadi maya lori ari Lutong nya nuju ngagai mengeri besai Miri ngena jalai lurus lalu, maya ia datai ba Kilometer 8 Lampu Trafik Pujut 7, bisi sebuah kerita ti datai ari Permyjaya nuju ngagai Piasau ngelantak tisi kiba lori nya,” ku iya.
“Maya penusah nya nyadi, deriba diputuska bebadi nyawa ba endur nya lalu penumpang ke duduk ba mua beumur 43 taun dianjung berubat ba Zon Mirah Sepital Miri.”
Kelimpah ari nya, deriba lori ke beumur 42 taun enggau orang tambang belakang kerita ke beumur 19 taun nadai bakal.
Ku Alexson nambah agi, penusah jalai alun nya udah ngujungka kerita nya rusak ba mua lalu lori rusak ba tisi kiba.
“Endur penusah jalai alun nya bisi lampu trafik simpang empat, lalu gaya hari maya penusah nya nyadi manah,” ku iya.
Bangkai tudah dianjung ngagai Bilik Bangkai Opis Forensik Sepital Miri ngambika ulih ngereja atur ti patut.
Kes ditasat ba baruh Seksyen 41 (1) Akta Perengka Pengangkut Jalai 1987.
Titihka TVS ba Telegram, Facebook,Twitter, Instagram, TikTok enggau YouTube.
