KUCHING: Naka ke diatu, 99 peratus pesakit COVID-19 ke udah divaksin di nengeri tu iya nya ba dalam kategori 1 enggau 2 taja pan sida dirampit varian Delta.
Ku Menteri Kaunsil Kandang Menua enggau Pengawa Berumah Datuk Seri Dr Sim Kui Hian madah, bepelasarka ari tinjau kes ke konsisten enggau peneleba ba menua luar mandangka 99 peratus pesakit COVID-19 ba kategori tu sigi gerai.
Iya madahka, mayuh ari sida ke dirampit COVID-19 sepengudah nerima tuchuk vaksin ngayanka kelai sakit ke enda raya.
Semina siti chara dikena meresa penyakit tu iya nya nguna peresa RT-PCR (PCR) tauka RTK Antigen (RTK-Ag).
“Tuju bejalaika peresa tu iya nya awakka penyakit tu enda ngerampit orang bukai enggau nagang pengekai penyakit tu.,” ku iya madah nengah penerang ti dikunsika ke iya ba laman Facebook.
Ku Dr Sim ke mega Penyanding Penemu Komiti Mutarka Penusah Ngenyit Nengeri (JPBN) Sarawak madah agi, naka ke diatu rayat Sarawak meri kerejasama ke rat baka beperesa pengerai sekalika ba palan perubat perintah tauka peribit dikena nentuka sida positif tauka enda.
“Kitai mesti terus bejejaga sereta anang begau tauka saru penemu ketegal berita pelesu seraya ngemeratka tanggungpengawa diri dikena nentuka penyakit tu enda majak ngekai ba dalam komuniti,” ku Dr Sim madah.
Berindik ari nya, rayat ulih neruska pengidup lebih selamat sereta tating sistem perubat enggau sepital ulih dikurangka.
Titihka TVS ba Telegram, Facebook, Twitter, Instagram, TikTok enggau YouTube.
