KUCHING: Bisi 2,522 kes positif COVID-19 baru diripotka ba Sarawak seharitu ti ngujungka penyampau semua kes positif COVID-19 di Sarawak nambah ngagai 112,245.
Ku Komiti Mutarka Penusah Ngenyit Nengeri Sarawak, pelilih menua Kuching ngerikodka kes ti pemadu tinggi iya nya 1,316 kes, ditangkanka enggau Serian (250), Bau (179), Sibu (157), Lundu (89), Tebedu (63), Tatau (50), Sri Aman (48), Bintulu (46), Mukah (34), Miri (32), Samarahan, Song enggau Pusa sama bela 31 kes, Subis (26), Selangau (23), Simunjan (18), Asajaya (16), Betong enggau Lawas (13), Limbang enggau Kanowit (8), Meradong (7), Saratok, Sarikei enggau Belaga sama bela 5 kes, Kapit (4), Julau enggau Matu (3), Pakan enggau Sebauh (2) sereta Beluru, Lubok Antu, Dalat enggau Daro sama bela satu kes.
Ari 2,522 kes baru ti diripotka nya, 418 iku bisi ngayanka kelai kena rampit igi penyakit COVID-19 lebuh beperesa pengerai.
Kelimpah ari nya, bisi dua kes pemati dirikodka seharitu di pelilih Sibu ti nyengkaum siku lelaki beumur 59 taun ke ngembuan penyakit komorbid, ia nya darah tinggi, kemi manis, dislipidemia, gout sereta penyakit bukai, sereta siku anak mit indu ke beumur lapan tahun di Pelilih Serian.
Nangkanka nya, bisi 832 kes baru ke udah gerai sereta dikemendarka pansut ari sepital.
Tu nambahka penyampau semua kes positif COVID-19, ke udah gerai enggau dikemendarka pansut ari sepital, ngagai 87,861 iku.
Penyampau kes ke agi diperubat enggau diengkah ba PKRC sereta wad sepital iya nya 23,664 iku.
Nangkanka nya, bisi siti kluster komuniti baru ditukuka ia nya Kluster Kaman ba pelilih Bau.
Kluster tu ngaul peranak di Kampung Kaman, Krokong, Bau.
Dua kluster udah punas keharitu , ia nya Kluster Abu Bengang, Saratok enggau Kluster Pasar Stutong 2, Kuching.
Naka ke diatu, 130 kluster mengkang aktif di Sarawak.
Titihka TVS ba Telegram, Facebook, Twitter, Instagram, TikTok enggau YouTube.
