Sepenyampau 1,382 kompaun ti beungkus RM3.6 juta dikeluarka di pelilih Kuching sepemanjai timpuh Atur Nagang Pemindah Diteritka Agi (PKPD) 3.0 dipejalaika berengkah ari 1 hari bulan Enam nyentukka 27 hari bulan Lapan 2021.
Tuai Polis Pelilih Kuching ACP Ahsmon Bajah madahka, ari penyampau kompaun nya, penyalah pansut ngelui ari jam ke udah ditetapka raban penerit adat entara penyalah pemadu tinggi dirikodka enggau 383 kes ditangkanka enggau nadai seraka fizikal iya nya 279 kes.
“Kelimpah ari nya, entara penyalah ditemu iya nya nadai nguna sengkabung mua （173 ）, mai orang tambang lebih ari tatak (136), enda ngerijista aplikasyen Mysejahtera (129) enggau bejalaika aktiviti ba palan mensia mayuh (79) udah dikompaun ba timpuh ke sama.” ku iya dalam siti penerang sehari tu.
Ku iya nambah agi, penyalah ke bukai iya nya enda ngasika Standard Atur Pengawa (SOP) PKPD ti ngerikodka 58 kes lalu premis beoperasyen enggau nadai pemendar iya nya 38 kes.
Entudika nya, pemindah meraka pelilih ti nadai permit (17) sereta ngelawa premis beoperasyen enggau nadai pemendar (22).
“Tu entara 10 penyalah keterubah dikompaun ba endur Indu Opis Pelilih Kuching sepemanjai timpuh PKP 3.0,” ku iya madah agi.
Titihka TVS ba Telegram, Facebook, Twitter, Instagram, TikTok enggau YouTube.
