SIMANGGANG: Bisi 128 gerempung ba sitak Kunsil Nengeri (DUN) Simanggang nerima chek Projek Mit Menua Pesisir (MRP) ti beungkus RM402,000.
Menteri Muda Pengelantang Komuniti, Datuk Francis Harden Hollis, nyuaka chek MRP nya bedau lama ti udah ngagai mayuh bengkah gerempung, nyengkaum Komiti Pengelikun enggau Pemansang Rumah Panjai (JKKK), rumah sembiang enggau kelab ba sekeda endur.
“Guna enggau manah agih MRP tu kena ngatur aktiviti gerempung tauka kelab. Pia mega, ngagai chairman tauka pengari ke datai, terangka ngagai rayat kita pasal MRP ti diberi Perintah Sarawak,” ku iya.
Harden ke mega Kaban Kunsil Nengeri (ADUN) Simanggang madah, perintah Gabungan Parti Sarawak (GPS) endang seruran ngemeratka pengelantang rayat.
“Projek pemansang di Sarawak dipeda bejalai lanchar ba baruh iring GPS laban kitai ulih ngatika diri enggau nanggung ungkus projek nya nyengkaum ba sitak DUN Simanggang,” ku iya.
“Mayuh pemansang udah, benung sereta deka dipejalai nitih kedeka rayat kena ngangkatka tikas pengidup.”
Nangkanka nya, Harden madah, entara pemansang ti ditemegahka, ia nya Waterfront Batang Lupar, Sepital Sri Aman II enggau Pasar Tamu.
Ku iya, tu nyengkaum ngaga sistem parit di Sungai Bakir, Jalai Kejatau, Kampung Muhibbah, Simpang Jalai Brayun/Pasir Panas enggau Taman Gamang.
Projek ngaga Sri Aman Peace Park nyengkaum ngemanahka agi rumah segi lapan (Rumah Sri Aman), ngemanahka Loji Ai Empango, Bayai sereta nambah kapasiti ai ari 33.3 MLD ngagai 53.3 MLD, projek bekal ai ari Guntong ngagai Ulu Paku enggau Batu Lintang Undop, projek bekal elekterik Rumah Gunuong, Kampung Samak ari Kampung Kaong, Undop Sri Aman, benung chakah dipejalai.
Titihka TVS ba Telegram, Facebook, Twitter, Instagram, TikTok enggau YouTube
