KUCHING, 21 Julai – Raban nembiak rebak baru diperansang belematika reti Hari Sarawak ti disambut kena 22 hari bulan 7 awakka sida nemu senentang tunga kuing Sarawak ti semina ulih ditentuka rayat Sarawak empu.
Ku Sapit Kepala Menteri Datuk Amar Awang Tengah Ali Hasan madah, reti Hari Sarawak tu diintu ukai semina ngenang sereta nusui senentang sejarah ungkup rayat Sarawak aja.
“Ba dalam pejalai kitai nuju status nengeri mansang manggai taun 2030, kitai mesti meretika senentang pemar ke ditapi sereta tanggungpengawa tu ukai pekara ke mudah,” ku iya madah lebuh bejaku beserimbai enggau Hari Sarawak 2021.
Beduduk ari nya, Awang Tengah madahka, dikena nentuka juluk nya mujur dijapai, rayat Sarawak mesti terus beserakup sereta besaup ngemansangka ekonomi sereta nempa modal mensia ke bisi pengelandik sereta mantu nyungkak pemansang Sarawak ke tikas lebih tinggi agi.
Iya mega meransang rayat Sarawak terus negapka penyerakup enggau pangan diri enda malik bida batang pengarap, bansa sereta budaya ti dikemeranka sida.
Pekara tu chukup beguna dikena nentuka Sarawak semampai tegap ari sukut politik, pengelikun, pengelantang sereta terus nyingkang mansang ke luan.
Lebuh ngenang sejarah, iya madahka, 22 hari bulan 7 siti hari bulan ke chukup bereti ungkup rayat Sarawak lebuh Sarawak lepas ari koloni perintah British, lalu ngujungka Sarawak ulih merintah nengeri diri.
