BELURU: Pemayuh endur ti ditukuka bisi penyakit rabies di Sarawak udah nambah ngagai 72 iti pengudah Kampung Mohd Taha di Bakong, Beluru, nyadi kandang endur penyakit nya ti baru kena Hari Tiga.
Sapit Kepala Menteri Sarawak, Datuk Amar Douglas Uggah Embas madah, Kampung Mohd Taha ditukuka kandang endur penyakit rabies laban ia dalam radius 10 kilometer ari kandang endur ti udah bisi kes rabies sebedau tu.
Datuk Amar Douglas Uggah Embas
“Naka ke diatu, 72 kandang endur udah ditukuka bisi penyakit rabies kenyau ari bulan Julai 2017, ia nya Kuching tujuh, Samarahan empat, Serian 22, Sri Aman enam, Betong tiga, Sarikei lima, Sibu tiga, Kapit satu, Mukah enam, Bintulu lima, Miri lapan, enggau Limbang dua,” ku Uggah.
Nitihka pemadah ari Opis Servis Veterinar Sarawak (JPVS), 206,629 iku ukui udah dituchuk enggau vaksin anti-rabies, lalu program betuchuk vaksin nya ti enda bebayar deka meruan dipejalai ba selampur menua Sarawak.
Berebak enggau nya, pengempu ukui dikeingatka nuchuk ukui sida enggau vaksin nya sekali setaun.
Vaksin rabies ulih dituchuk ba sebarang alai opis veterinar pelilih menua tauka ba klinik veterinar peribit.
Nyema atur nya enda dititih, pengempu ukui ulih dituku salah ba baruh Seksyen 40, Ordinan Pengerai Mensia Mayuh Veterinar1999. Ukum enda lebih ari RM2,500 tau diletak, lalu ukui sida ulih ditangkap nyema sida nadai ngembuan bukti ukui sida udah dituchuk vaksin anti-rabies.
JPVS madahka ulah ngelepaska ukui enggau enda dipatau deka ngujungka ukui nya ulih dirampit enggau virus rabies.
Ulah mai ukui pansut ari kandang endur ti bisi penyakit rabies enggau nadai surat pemendar ari opis penerit atur veterinar endang siti penyalah ba baruh Seksyen 37 ti ulih diukum enda lebih RM5,000 tauka dijil enda lebih tiga bulan, tauka kedua-dua ia sekali enti ditemu salah.
Kelimpah ari nya, pengempu jelu mesti periri ukui enggau mayau sida ngambika enda beranak sereta begulai enggau jelu lelang bukai.
Enti ukui bisi penyakit rabies, ulah ukui nya bisi ubah. Ia nyadi mangah, ka ngetup, mulut bepupu, enggai dipegai, enggai kena ai enggau penampak, enggai ninga nyawa, enggai makai tauka ngirup, lemi tulang, mati tubuh lalu ngujungka ia parai.
Ukui ti dipeda bisi simptom baka nya mesti diripot enggau jampat ngagai JPVS nengah lumur telefon +6082-628248 /+6082-610023 (Unit Epidemiologi enggau Pematau) tauka 016-2557267 (WhatsApp Rabies/Mesej).
Orang ke bisi kena ketup tauka dikeramak ukui tauka mayau mesti dianjung ngagai sepital enggau naka pengelengkas ngambika sida ulih diubat enggau manah.
