Kuching, 24 Jun: Dewan Komuniti Taman Harmoni ti diguna nyadi palan kuarantin enggau berubat Covid-19 (PKRC) kedua di Sri Aman diatu tembu diangkatmanah enggau udah berengkah dibuka kemari.
Menteri Muda Pengelantang Komuniti, Datuk Francis Harden Hollis madah, PKRC kedua tu dikena nampung penyampau pesakit di Bagi Menua Sri Aman laban PKRC Stadium Tetutup Sri Aman diatu udah ba tikas maksimum deka penuh berindik ari kes positif Covid-19 di pelilih menua Sri Aman majak nambah.
“Ba PKRC Dewan Taman Harmoni chukup nampung kapasiti 100 iku orang dalam siti timpuh. Naka ke diatu, PKRC nya udah nerima lima iku pesakit.”ku iya
Kes di Sri Aman nyau majak nambah pengudah musim pengerami Hari, Gawai, nyadi PKRC Stadium Tetutup Sri Aman enda ulih nampung penyampau pesakit.
Nya alai, sekeda dianjung ngagai PKRC di Betong enggau PKRC di Serian.
Harden ke mega Kaban Kunsil Nengeri (ADUN) Simanggang madah, penumbuh PKRC kedua tu asil ari pemutus nengah aum Komiti Mutarka Penusah Ngenyit Bagi Menua Sri Aman lalu dikemendarka JPBN Sarawak.
