KUCHING, 15 Jun – Enti baka selama, adat komuniti Dayak di Sarawak iya nya “Ngiling Bidai” diatur nandaka penutup pengerami Hari Gawai.
‘Ngiling Bidai’ bagi orang Iban enggau ‘Mparing Sawa’ ba komuniti Bidayuh ti mai reti ‘Mulaika Taun’ sebedau ngepunka pengawa bumai bekebun ba taun ke bukai.
Sekali tu ba keterubah Tukang Rantek Claudius ngatur ‘Pekit Personaliti Popular Ngiling Bidai/Mparing Sawa 2021’ ti mungkur raban orang tuai umur ngena chara virtual seriris ngemeranka norma baru berindik ari pamdemik Covid-19.
Pengatur pekit, Claudius Clayton anak Weson tebuka runding deka ngatur pekit ngiling bidai tauka mparing sawa ti ngangkatka orang ke tuai umur.
Tuju kebendar pekit tu diatur iya nya dikena nerenak pengerindu sereta ngenanka pemanah ngepan asal bansa Dayak ngambika enda lenyau ditelan arus pemansang sereta bisi dipeda rebak biak dudi hari ila.
“Nengah chara tu mega siti pelasar alai nyerakupka semua komuniti Dayak kelimpah meri awak ngagai sida ti bepangkat ini ngasai kediri bepekit nyadika kenang ba pengidup sida,” ku iya.
Pekit tu mega dibagi ngagai tiga kategori iya nya kategori nembiak mit baruh 12 taun, apai indai enggau aki ini lalu pekit tu tebuka ngagai semua peranak malaysia ke bansa Dayak.
Champion bagi pekit tu deka nerima perais RM500, penuduk lumur dua RM300 enggau ketiga RM200.
Timpuh ngundi pemekit iya nya berengkah 11 Jun enggau hari bulan tutup pekit kena 30 Jun tu.
Pemenang pekit tu ila deka dipadahka kena 1 hari bulan Julai tu ila.
Penerang ke silik tau betanya ngagai Claudius tauka ngelawa ngagai laman facebook Tukang Rantek.
