KUCHING: Ejensi Penerit Atur Maritim Malaysia (APMM) Sarawak enggau bala Soldadu Tasik Diraja Malaysia (TLDM) deka matau sereta nyaga tasik ba menua tu, kelebih agi ngelingi kandang endur Beting Patinggi Ali.
Direktor Maritim Sarawak, Laksamana Pertama Maritim, Zin Azman Md Yunus, madahka pekara tu lebuh dipinta nerangka enggau silik pasal kapal pematau tasik ari China ti disebut ‘nyaga’ endur beting nya.
Pekara nya, ku iya, ukai isu ti baru.
“Taja pia, APMM enggau TLDM deka chakah sereta seruran matau kandang endur Beting Patinggi Ali ninting hari,” ku Zin.
Nangkanka nya, sekeda raban ke nginti dia madah, kapal matau tasik ari China nya disidi bisi mansa beting nya, ti bepalan kira-kira 84 batu nautika ari tebing tasik Miri.
Direktor Zon Maritim Miri, Kapten Md Fauzi Othman, madah, raban iya nerima siti ripot pasal penatai kapal matau tasik ari China kena 4 hari bulan Jun tu tadi.
“Au, kami bisi nerima ripot pasal penatai kapal matau tasik ari China nya, ti dipeda bisi dalam tasik menua kena 4 hari bulan Jun tu tadi,” ku Md Fauzi.
“Aset kami, nyengkaum ari TLDM, bejalaika enggau terit pengawa matau dalam kandang endur nya.”
Iya nyebut nya lebuh ditelefon ulih pengarang berita kena Hari Satu.
Md Fauzi nambah, aset sida udah diengkah semak Beting Patinggi Ali sepemanjai taun tu ngambika matau kandang endur nya sereta nyaga pengelikun menua.
Ba taun 2015, lebuh menteri ba Opis Menteri Besai Malaysia maya nya, Datuk Seri Shahidan Kassim, nemuai ngagai Miri, iya bisi madah ngagai bala pengarang berita pasal sebuah kapal matau tasik ari China ti ditemu bisi sangkai ba Beting Patinggi Ali sereta kala tama ke dalam tasik Malaysia.
Beting nya mega dikumbai kandang terumbu Luconia ti bepalan kira-kira 100 kilometer nautika ari tebing tasik Sarawak sereta mega dalam zon ekonomi eksklusif (EEZ) Malaysia. -TVS
