SIBU: Pengudah nganti kekira 30 taun peranak di Bawang Assan ulih ngasaika perengkaguna iya nya jalai ke lebih manah enti projek Jalai Sungai Bidut/Kampung Sebedil/Kampung Bungan Kecil tembu.
Ngambi ripot ari Unit Komunikasyen Awam (UKAS), ku Sapit Kepala Menteri, Tan Sri Datuk Amar Dr. James Jemut Masing, projek nya deka digaga dalam dua pakej iya nya Pakej A begunaka ungkus penyampau RM104 juta sepemanjai 22 kilometer enggau dipelabaka siap maya 27 November taun baru.
Skop projek tu nyengkaum pengawa ngaga jematan Sungai Sabang enggau Sungai Tutus ti sama bela 12 meter sereta 18m.
Nangkan ke nya, pakej B ku iya ngaul pengawa ngaga Jalai Kampung Sebedil enggau Kampung Bungan Kecil sepemanjai 16 kilometer ti beungkus RM200 juta.
Tan Sri James Masing ti mega Menteri Pemansang Penyangkai Kapal enggau Infrastruktur madahka, jalai nya deka terus disambung enggau Jematan Igan ti udah dipenyadika Kepala Menteri Datuk Patinggi Abang Zohari apin lama ke udah.
Kelimpah ari nya, tu ngujungka, iya nambahka penumbuh sosio-ekonomi di kandang endur ti bedampih nengah akses disediaka lebih likun enggau mudah ari mengeri besai ke kandang luar mengeri di nengeri tu.
